Chapter 52

Vi_52

suvarṇasteyakṛd rājñe karmācakṣāṇo musalam arpayet // Vi_52.1 //

vadhāt tyāgād vā prayato bhavati // Vi_52.2 //

mahāvrataṃ dvādaśābdāni vā kuryāt // Vi_52.3 //

nikṣepāpahārī ca // Vi_52.4 //

dhānyadhanāpahārī ca kṛcchram abdam // Vi_52.5 //

manuṣyastrīkūpakṣetravāpīnām apahāre cāndrāyaṇam // Vi_52.6 //

dravyāṇām alpasārāṇāṃ sāṃtapanam // Vi_52.7 //

bhakṣyabhojyayānaśayyāsanapuṣpamūlaphalānāṃ pañcagavyapānam // Vi_52.8 //

tṛṇakāṣṭhadrumaśuṣkānnaguḍavastracarmāmiṣāṇāṃ trirātram upavaset // Vi_52.9 //

maṇimuktāpravālatāmrarajatāyaḥkāṃsyānāṃ dvādaśāhaṃ kaṇān aśnīyāt // Vi_52.10 //

kārpāsakīṭajorṇādyapaharaṇe trirātraṃ payasā varteta // Vi_52.11 //

dviśaphaikaśaphāpaharaṇe dvirātram upavaset // Vi_52.12 //

pakṣigandhauṣadhirajjuvaidalānām apaharaṇe dinam upavaset // Vi_52.13 //

dattvaivāpahṛtaṃ dravyaṃ dhanikasyāpy upāyataḥ /

prāyaścittaṃ tataḥ kuryāt kalmaṣasyāpanuttaye || Vi_52.14 ||

yad yat parebhyas tv ādadyāt puruṣas tu niraṅkuśaḥ /

tena tena vihīnaḥ syād yatra yatrābhijāyate || Vi_52.15 ||

jīvitaṃ dharmakāmau ca dhane yasmāt pratiṣṭhitau /

tasmāt sarvaprayatnena dhanahiṃsāṃ vivarjayet || Vi_52.16 ||

prāṇihiṃsāparo yas tu dhanahiṃsāparas tathā /

mahad duḥkham avāpnoti dhanahiṃsāparas tayoḥ || Vi_52.17 ||