Chapter 50

Vi_50

vane parṇakuṭīṃ kṛtvā vaset // Vi_50.1 //

triṣavaṇaṃ snāyāt // Vi_50.2 //

svakarma cācakṣāṇo grāme grāme bhaikṣyam ācaret // Vi_50.3 //

tṛṇaśāyī ca syāt // Vi_50.4 //

etan mahāvratam // Vi_50.5 //

brāhmaṇaṃ hatvā dvādaśasaṃvatsaraṃ kuryāt // Vi_50.6 //

yāgasthaṃ kṣatriyaṃ vaiśyaṃ vā // Vi_50.7 //

gurviṇīṃ rajasvalāṃ vā // Vi_50.8 //

atrigotrāṃ vā nārīm // Vi_50.9 //

mitraṃ vā // Vi_50.10 //

nṛpativadhe mahāvratam eva dviguṇaṃ kuryāt // Vi_50.11 //

pādonaṃ kṣatriyavadhe // Vi_50.12 //

ardhaṃ vaiśyavadhe // Vi_50.13 //

tadardhaṃ śūdravadhe // Vi_50.14 //

sarveṣu śavaśirodhvajī syāt // Vi_50.15 //

māsam ekaṃ kṛtavāpano gavām anugamanaṃ kuryāt // Vi_50.16 //

tāsv āsīnāsv āsīta // Vi_50.17 //

sthitāsu sthitaś ca syāt // Vi_50.18 //

sannāṃ coddharet // Vi_50.19 //

bhayebhyaś ca rakṣet // Vi_50.20 //

tāsāṃ śītāditrāṇam akṛtvā nātmanaḥ kuryāt // Vi_50.21 //

gomūtreṇa snāyāt // Vi_50.22 //

gorasaiś ca varteta // Vi_50.23 //

etad govrataṃ govadhe kuryāt // Vi_50.24 //

gajaṃ hatvā pañca nīlavṛṣabhān dadyāt // Vi_50.25 //

turagaṃ vāsaḥ // Vi_50.26 //

ekahāyanam anaḍvāhaṃ kharavadhe // Vi_50.27 //

meṣājavadhe ca // Vi_50.28 //

suvarṇakṛṣṇalam uṣṭravadhe // Vi_50.29 //

śvānaṃ hatvā trirātram upavaset // Vi_50.30 //

hatvā mūṣakamārjāranakulamaṇḍūkaḍuṇḍubhājagarāṇām anyatamam upoṣitaḥ kṛsaraṃ brāhmaṇaṃ bhojayitvā lohadaṇḍaṃ dakṣiṇāṃ dadyāt // Vi_50.31 //

godholūkakākajhaṣavadhe trirātram upavaset // Vi_50.32 //

haṃsabakabalākāmadguvānaraśyenabhāsacakravākānām anyatamaṃ hatvā brāhmaṇāya gāṃ dadyāt // Vi_50.33 //

sarpaṃ hatvābhrīṃ kārṣṇāyasīṃ dadyāt // Vi_50.34 //

ṣaṇḍhaṃ hatvā palālabhārakam // Vi_50.35 //

varāhaṃ hatvā ghṛtakumbham // Vi_50.36 //

tittiriṃ tiladroṇam // Vi_50.37 //

śukaṃ dvihāyanavatsam // Vi_50.38 //

krauñcaṃ trihāyanam // Vi_50.39 //

kravyādamṛgavadhe payasvinīṃ gāṃ dadyāt // Vi_50.40 //

akravyādamṛgavadhe vatsatarīm // Vi_50.41 //

anuktamṛgavadhe trirātraṃ payasā varteta // Vi_50.42 //

pakṣivadhe naktāśī syāt // Vi_50.43 //

rūpyamāṣaṃ vā dadyāt // Vi_50.44 //

hatvā jalacaram upavaset // Vi_50.45 //

asthanvatāṃ tu sattvānāṃ sahasrasya pramāpaṇe /

pūrṇe cānasy anasthnāṃ tu śūdrahatyāvrataṃ caret || Vi_50.46 ||

kiṃcid eva tu viprāya dadyād asthimatāṃ vadhe /

anashthnāṃ caiva hiṃsāyāṃ prāṇāyāmena śudhyati || Vi_50.47 ||

phaladānāṃ tu vṛkṣāṇāṃ chedane japyam ṛkśatam /

gulmavallīlatānāṃ ca puṣpitānāṃ ca vīrudhām || Vi_50.48 ||

annādyajānāṃ sattvānāṃ rasajānāṃ ca sarvaśaḥ /

phalapuṣpodbhavānāṃ ca ghṛtaprāśo viśodhanam || Vi_50.49 ||

kṛṣṭajānām oṣadhīnāṃ jātānāṃ ca svayaṃ vane /

vṛthālambhe 'nugacched gāṃ dinam ekam payovrataḥ || Vi_50.50 ||