Chapter 48

Vi_48

atha karmabhir ātmakṛtair gurum ātmānaṃ manyetātmārthe prasṛtiyāvakaṃ śrapayet // Vi_48.1 //

na tato 'gnau juhuyāt // Vi_48.2 //

na cātra balikarma // Vi_48.3 //

aśṛtaṃ śrapyamāṇaṃ śṛtaṃ cābhimantrayet // Vi_48.4 //

śrapyamāṇe rakṣāṃ kuryāt // Vi_48.5 //

brahmā devānāṃ padavīḥ kavīnām ṛṣir viprāṇāṃ mahiṣo mṛgāṇām /

śyeno gṛdhrāṇāṃ svadhitir vanānāṃ somaḥ pavitram atyeti rebhan || Vi_48.6 ||

iti darbhān badhnāti // Vi_48.6 //

śṛtaṃ ca tam aśnīyāt pātre niṣicya // Vi_48.7 //

ye devā manojātā monojuṣaḥ sudakṣā dakṣapitaras te naḥ pāntu te no 'vantu tebhyo namas tebhyaḥ svāhety ātmani juhuyāt // Vi_48.8 //

athācānto nābhim ālabheta // Vi_48.9 //

snātāḥ pītā bhavata yūyam āpo 'smākam udare yavāḥ, tā asmabhyam anamīvā ayakṣmā anāgasaḥ santu devīr amṛtāṃ ṛtāvṛdha iti // Vi_48.10 //

trirātraṃ medhārthī // Vi_48.11 //

ṣaḍrātraṃ pāpakṛt // Vi_48.12 //

saptarātraṃ pītvā mahāpātakinām anyatamaṃ punāti // Vi_48.13 //

dvādaśarātreṇa pūrvapuruṣakṛtam api pāpaṃ nirdahati // Vi_48.14 //

māsaṃ pītvā sarvapāpāni // Vi_48.15 //

gonihāramuktānāṃ yavānām ekaviṃśatirātraṃ ca // Vi_48.16 //

yavo 'si dhānyarājo 'si vāruṇo madhusaṃyutaḥ /

nirṇodaḥ sarvapāpānāṃ pavitram ṛṣibhir dhṛtam || Vi_48.17 ||

ghṛtaṃ yavā madhu yavā āpo vā amṛtaṃ yavāḥ /

sarve punīta me pāpaṃ yan me kiṃcana duṣkṛtam || Vi_48.18 ||

vācā kṛtaṃ karmakṛtaṃ manasā durvicintitam /

alakṣmīṃ kālakarṇīṃ ca nāśayadhvaṃ yavā mama || Vi_48.19 ||

śvasūkarāvalīḍhaṃ ca ucchiṣṭopahataṃ ca yat /

mātāpitror aśuśrūṣāṃ tat punīdhvaṃ yavā mama || Vi_48.20 ||

gaṇānnaṃ gaṇikānnaṃ ca śūdrānnaṃ śrāddhasūtakam /

caurasyānnaṃ navaśrāddhaṃ punīdhvaṃ ca yavā mama || Vi_48.21 ||

bāladhūrtam adharmaṃ ca rājadvārakṛtaṃ ca yat /

suvarṇastainyam avrātyam ayājyasya ca yājanam /

brāhmaṇānāṃ parīvādaṃ punīdhvaṃ ca yavā mama || Vi_48.22 ||