Chapter 45

Vi_45

narakābhibhūtaduḥkhānāṃ tiryaktvam uttīrṇānāṃ mānuṣyeṣu lakṣaṇāni bhavanti // Vi_45.1 //

kuṣṭhy atipātakī // Vi_45.2 //

brahmahā yakṣmī // Vi_45.3 //

surāpaḥ śyāvadantakaḥ // Vi_45.4 //

suvarṇahārī kunakhī // Vi_45.5 //

gurutarlpago duścarmā // Vi_45.6 //

pūtināsaḥ piśunaḥ // Vi_45.7 //

pūtivaktraḥ sūcakaḥ // Vi_45.8 //

dhānyacoro 'ṅgahīnaḥ // Vi_45.9 //

miśracoro 'tiriktāṅgaḥ // Vi_45.10 //

annāpahārakas tv āmayāvī // Vi_45.11 //

vāgapahārako mūkaḥ // Vi_45.12 //

vastrāpahārakaḥ śvitrī // Vi_45.13 //

aśvāpahārakaḥ paṅguḥ // Vi_45.14 //

devabrāhmaṇākrośako mūkaḥ // Vi_45.15 //

lolajihvo garadaḥ // Vi_45.16 //

unmatto 'gnidaḥ // Vi_45.17 //

guroḥ pratikūlo 'pasmārī // Vi_45.18 //

goghnas tv andhaḥ // Vi_45.19 //

dīpāpahārakaś ca // Vi_45.20 //

kāṇaś ca dīpanirvāpakaḥ // Vi_45.21 //

trapucāmarasīsakavikrayī rajakaḥ // Vi_45.22 //

ekaśaphavikrayī mṛgavyādhaḥ // Vi_45.23 //

kuṇḍāśī bhagāsyaḥ // Vi_45.24 //

ghāṇṭikaḥ stenaḥ // Vi_45.25 //

vārdhuṣiko bhrāmarī // Vi_45.26 //

mṛṣṭāśy ekākī vātagulmī // Vi_45.27 //

samayabhettā khalvāṭaḥ // Vi_45.28 //

ślīpady avakīrṇī // Vi_45.29 //

paravṛttighno daridraḥ // Vi_45.30 //

parapīḍākaro dīrgharogī // Vi_45.31 //

evaṃ karmaviśeṣeṇa jāyante lakṣaṇānvitāḥ /

rogānvitās tathāndhāś ca kubjakhañjaikalocanāḥ || Vi_45.32 ||

vāmanā badhirā mūkā durbalāś ca tathāpare /

tasmāt sarvaprayatnena prāyaścittaṃ samācaret || Vi_45.33 ||