Chapter 7

darśane pratyaye dāne prātibhāvyaṃ vidhīyate /

ādyau tu vitathe dāpyāv itarasya sutā api || Vi_6 41 ||

bahavaś cet pratibhuvo dadyus te 'rthaṃ yathākṛtam /

arthe 'viśeṣite tv eṣu dhanikacchandataḥ kriyā || Vi_6 42 ||

yam arthaṃ pratibhūr dadyād dhanikenopapīḍitaḥ /

ṛṇikas taṃ pratibhuve dviguṇaṃ dātum arhati || Vi_6 43 ||

Vi_7

atha lekhyaṃ trividham // Vi_7.1 //

rājasākṣikaṃ sasākṣikam asākṣikaṃ ca // Vi_7.2 //

rājādhikaraṇe tanniyuktakāyasthakṛtaṃ tadadhyakṣakaracihnitaṃ rājasākṣikam // Vi_7.3 //

yatra kvacana yena kenacil likhitaṃ sākṣibhiḥ svahastacihnitaṃ sasākṣikam // Vi_7.4 //

svahastalikhitam asākṣikam // Vi_7.5 //

tat balāt kāritam apramāṇam // Vi_7.6 //

upadhikṛtāni sarvāṇy eva // Vi_7.7 //

dūṣitakarmaduṣṭasākṣyaṅkitaṃ sasākṣikam api // Vi_7.8 //

tādṛgvidhena lekhakena likhitaṃ ca // Vi_7.9 //

strībālāsvatantramattonmattabhītatāḍitakṛtaṃ ca // Vi_7.10 //

deśācārāviruddhaṃ vyaktādhikṛtalakṣaṇam aluptaprakramākṣaraṃ pramāṇam // Vi_7.11 //

varṇaiś ca tatkṛtaiś cihnaiḥ patrair eva ca yuktibhiḥ /

saṃdigdhaṃ sādhayel lekhyaṃ tadyuktipratirūpitaiḥ || Vi_7.12 ||

yatra+ṛṇī dhaniko vāpi sākṣī vā lekhako 'pi vā /

mriyate tatra tallekhyaṃ tatsvahastaiḥ prasādhayet || Vi_7.13 ||