Wilt thu, fus haele, fremdne monnan,
Medieval Unknown old_englishtransliterator: thothica
work_id: "d5fe9e58-3f94-4c5e-961f-267c5e2f09f4" work_slug: "unknown-old-english-elegies-d5fe9e" work_title: Old English Elegies author_name: Unknown chapter_number: 15 chapter_title: Wilt thu, fus haele, fremdne monnan, chapter_slug: "15-wilt-thu-fus-haele-fremdne-monnan" variant_id: "f8eded30-94c7-43a8-bf7c-44be16c0d89e" content_type: transliteration layout: prose language: old_english source_language: old_english language_direction: ltr script: latin word_count: 599 estimated_read_time: 5
Wilt thu, fus haele, fremdne monnan, wisne wothboran wordum gretan, fricgan felageongne ymb forthgesceaft, biddan a gesecge sidra gesceafta craeftas cyndelice cwichrerende, tha a dogra gehwam thurh dom godes bringe wundra fela wera cneorissum! Is thara anra gehwam orgeate tacen, tham thurh wisdom woruld ealle con behabban on hrethre, hycgende mon, thaet geara iu, gliwes craefte, mid gieddingum guman oft wrecan, rincas raedfaeste; cuthon ryht sprecan, thaet a fricgende fira cynnes ond secgende searoruna gespon a gemyndge maest monna wiston. Forthon scyle ascian, se the on elne leofath, deophydig mon, dygelra gesceafta, bewritan in gewitte wordhordes craeft, faestnian ferthsefan, thencan forth teala; ne sceal thaes athreotan thegn modigne, thaet he wislice woruld fulgonge. Leorna thas lare. Ic the lungre sceal meotudes maegensped maran gesecgan, thonne thu hygecraeftig in hrethre maege mode gegripan. Is sin meaht forswith. Nis thaet monnes gemet moldhrerendra, thaet he maege in hrethre his heah geweorc furthor aspyrgan thonne him frea sylle to ongietanne godes agen bibod; ac we sculon thoncian theodne maerum awa to ealdre, thaes the us se eca cyning on gaeste wlite forgiefan wille thaet we eathe magon upcund rice forth gestigan, gif us on ferthe geneah ond we willath healdan heofoncyninges bibod. Gehyr nu this herespel ond thinne hyge gefaestna. Hwaet, on frymthe gescop faeder aelmihtig, heah hordes weard, heofon ond eorthan, saes sidne grund, sweotule gesceafte, tha nu in tham thream thurh theodnes hond heath ond hebbath thone halgan blaed. Forthon eal swa teofanade, se the teala cuthe, aeghwylc with othrum; sceoldon eal beran stithe stefnbyrd, swa him se steora bibead missenlice gemetu thurh tha miclan gecynd. Swa hi to worulde wlite forth berath dryhtnes duguthe ond his daeda thrym, lixende lof in tha longan tid, fremmath faestlice frean ece word in tham frumstole the him frea sette, hluttor heofones weard, healdath georne mere gemaere; meaht forth tihth heofoncondelle ond holmas mid, lathath ond laedeth lifes agend in his anes faethm ealle gesceafta. Swa him wideferh wuldor stondeth, ealra demena tham gedefestan, the us this lif gescop, ond this leohte beorht cymeth morgna gehwam ofer misthleothu wadan ofer waegas wundrum gegierwed, ond mid aerdaege eastan snoweth wlitig ond wynsum wera cneorissum; lifgendra gehwam leoht forth biereth bronda beorhtost, ond his brucan mot aeghwylc on eorthan, the him eagna gesihth sigora sothcyning syllan wolde. Gewiteth thonne mith thy wuldre on westrodor forthmære tungol faran on heape, oththaet on aefenne ut garsecges grundas paetheth, glom other cigth; niht aefter cymeth, healdeth nydbibod halgan dryhtnes. Heofontorht swegl scir gescyndeth in gesceaft godes under foldan faethm, farende tungol. Forthon naenig fira thaes frod leofath thaet his maege aespringe thurh his aegne sped witan, hu geond grund faereth goldtorht sunne in thaet wonne genip under waetra gethring, oththe hwa thes leohtes londbuende brucan mote, siththan heo ofer brim hweorfeth. Forthon swa teofenede, se the teala cuthe, daeg with nihte, deop with hean, lyft with lagustream, lond with waege, flod with flode, fisc with ythum. Ne waciath thas geweorc, ac he hi wel healdeth; stondath stithlice bestrythed faeste miclum meahtlocum in tham maegenthrymme mid tham sy ahefed heofon ond eorthe. Beoth thonne eadge tha thaer in wuniath, hyhtlic is thaet heorthwerud. thaet is herga maest, eadigra unrim, engla threatas. Hy geseoth symle hyra sylfra cyning, eagum on wlitath, habbath aeghwaes genoh. Nis him wihte won, tham the wuldres cyning geseoth in swegle; him is symbel ond dream ece unhwylen eadgum to frofre. Forthon scyle mon gehycgan thaet he meotude hyre; aeghwylc aelda bearna forlaete idle lustas, laene lifes wynne, fundige him to lissa blisse, forlaete hetenitha gehwone sigan mid synna fyrnum, fere him to tham sellan rice.